So het streeklanddros André Geldenhuys ’n moordenaar geroskam voordat hy hom Maandag vir 18 jaar tronk toe gestuur het weens die moord op Elise “Saar” Holtzhausen (64).
Sy is op 13 Januarie 2009 in haar plaashuis op Alkmaar buite Nelspruit keelaf gesny.
Kort ná haar moord is Rodney Malatjie in verband met die moord aangekeer.
Hy was ten tyde van die moord 16 jaar oud en het op die plaas gewerk.
Malatjie het skuld ontken.
Hy het reg deur die vier jaar lange verhoor volgehou hy het van die voorval geweet, maar was nie self by die moord betrokke nie.
Sy makker is nooit opgespoor nie.
Geldenhuys het gesê Holtzhausen was bejaard en kon haarself nie verdedig nie.
Hy het Malatjie tot 12 jaar tronkstraf gevonnis weens die moord en tot ses jaar weens huisbraak. Die vonnisse moet aaneenlopend uitgedien word.
Holtzhausen het jare lank saam met haar man, prof. Kas Holtz-hausen, op die plaas Rietfontein, sowat 20 km buite Nelspruit, gewoon.