’n Nuwe ondersoek is begin na die verdwyning van twee
mans wat glo laas lewend in Winnie Madikizela-Mandela se geselskap gesien is.
Makhosini Nkosi, ’n woordvoerder van die nasionale
vervolgingsgesag (NVG), het gesê nuwe inligting is onlangs ontvang oor Lolo Sono
en Siboniso Shabalala, wat in 1988 verdwyn het. Hy het gesê daar word na hul
lyke gesoek, maar wou nie bevestig dat daar ’n verband met Madikizela-Mandela is
nie.
“Die ondersoek is nog nie afgehandel nie . . .Geen
grafte is nog bevestig of opgegrawe nie,” het hy in ’n verklaring gesê.
Volgens AP is die twee
mans in November 1988 laas lewend gesien by Madikizela-Mandela se huis in
Soweto.
Madikizela-Mandela is in 1991 skuldig bevind aan die
ontvoering en aanranding van vier jong mans. Sy is tot ses jaar tronkstraf
gevonnis, maar ná haar appèl is die vonnis tot ’n boete versag.
Volgens Nkosi werk ’n NVG-taakspan wat op verdwynings
fokus tans aan die saak van die vermiste twee mans.
As hul oorskot gevind word, sal die departement van
justisie dit amptelik aan die mans se familie oorhandig, het hy gesê. – Sapa
