In wat beskou word as nog ’n aanduiding van die “verwantskap”
tussen die mens en groot ape het navorsers nou bevind dat ape nes mense ’n
middeljarekrisis beleef.
Navorsers onder leiding van prof. Andrew Oswald van die
Universiteit van Warwick en dr. Alex Weiss van die Universiteit van Edinburg in
Brittanje het bevind die sjimpansee en orangoetang toon dieselfde simptome as
mense wat ’n middeljarekrisis beleef.
Die bevinding is gegrond op navorsing wat op sowat 508 ape in
dieretuine in die VSA, Japan, Kanada, Australië en Singapoer gedoen is.
Die bevindings is in die Proceedings of the National Academy of Sciences gepubliseer en
in ’n media-uitreiking van die Universiteit van Warwick vervat.
By mense verloop die “gelukkigheidsindeks” oor die algemeen
volgens ’n U-kurwe, waar die beginpunt van die U die jeugdige gelukkigheid
weerspieël.
Daar is ’n duidelike afname in “gelukkigheid” namate mense ouer word
en meer verantwoordelikheid moet hanteer. In die middeljarekrisis bereik die
gelukkigheid ’n laagtepunt, maar neem mettertyd weer toe.
Die ape se gelukkigheidsindeks is opgestel aan die hand van toetse,
in ’n groot mate soortgelyk aan toetse waaraan mense onderwerp word, en die ape
se oppassers, helpers en kundiges wat hulle goed ken.
Uit die toetse blyk dit dat ape, soos mense, ’n laagtepunt in hul
middeljare bereik wanneer verantwoordelikheid, soos kinders grootmaak, een van
die grootste prioriteite is.