Lede van die Cape Dance Company, wat gisteraand hul openingsaand in Newtown by die Dance Factory aangebied het, het aanvanklik gedink dit is ’n grap toe twee netjiese, gewapende mans omstreeks 20:00 eergister glimlaggend in die huis instap waar hulle tuisgegaan het.
Me. Makeda Crayton, ’n danser van New York, was eers verward toe een van die mans na haar geloop het terwyl hy met sy hand voor sy mond beduie het sy moet stilbly.
“Dit was so bisar. Ás so iets in die VSA gebeur, sal die rower nooit toelaat dat jy sy gesig sien nie. Dié man het na my aangeloop gekom en beduie ek moet stilbly.
“Ek dog toe dit is iemand se vriend wat ek nie ken nie.”
Dit is eers toe sy die vuurwapen in sy hand gesien het dat sy besef het daar is fout.
“Ek het so vinnig gehardloop. Die hele rooftog het tjoepstil verloop. Die oomblik toe almal besef wat gebeur, het ons net begin hardloop en probeer wegkruip.”
Die rowers het met net ’n BlackBerry weggekom, moontlik omdat daar meer mense in die huis was as waarop hulle gereken het, het me. Debbie
Turner, hoof van die dansgroep, gesê.
“Genadiglik het ons almal goed daarvan afgekom. As ek net dink wat kon gebeur het as hulle ons sakke met uitrustings, bladmusiek en tegniese toerusting gevat het. Of iemand dalk gewond het. Dit sou die einde van die show gewees het.
“Maar soos dansers maak, het almal vandag kliphard gewerk vir die laaste repetisie, want the show must go on.”