Ebrahim het die naweek ’n opskudding met sy stellings oor Israel veroorsaak en gister was die departement van internasionale betrekkinge en samewerking baie sku om die stellings te verduidelik.
“Ons het geen kommentaar nie. Die adjunkminister sal sy stellings op die mediakonferensie verduidelik,” was al wat Clayson Monyela, departementele woordvoerder, gister wou sê.
Ebrahim se stellings het die wenkbroue nogmaals laat lig oor konsekwentheid en oorkoepelende taktiek in Suid-Afrika se buitelandse beleid.
Pas verlede week het Suid-Afrika flikkers gegooi na Israel se voorste vennoot, die VSA, sodat Suid-Afrika die ekonomiese binnebaan kan behou deur die Afrika-groei-en-geleentheidswetgewing (Agoa) verder as 2015 verleng te kry.
“Weens die behandeling en beleid van Israel jeens die Palestynse volk wil ons Suid-Afrikaners ten sterkste afraai om daarheen (na Israel) te gaan, en wil ons Suid-Afrikaanse maatskappye afraai om enigiets met die versterking van Israel se besetting van Palestynse gebiede te doen te hê,” het Ebrahim gesê.
Ebrahim sal na verwagting vandag skerp vrae moet trotseer oor hoe sy siening strook met Suid-Afrika se stilswye rakende China se besetting van Tibet of die stille diplomasie wat jeens Zimbabwe gevolg word.
Ebrahim se stellings volg op ’n besluit deur die ANC-beheerde KwaZulu-Natalse regering dat ’n groep burgemeesters en munisipale bestuurders uit dié provinsie nie op ’n beplande besoek na Israel mag vertrek nie.
Ebrahim se reaksie hierop was ewe sterk bewoord: “Israel is ’n besettingsmag wat Palestina onderdruk. Dit is dus nie fatsoenlik vir Suid-Afrika om met Israel te assosieer nie. Ons raai mense af om soontoe te gaan, tensy dit met vredespogings te doen het.”