Kirsty Theologo se vriende was nuuskierig oor
satanisme, het nie mooi geweet wat dit behels nie en het besluit om ’n offer te
brand toe hulle petrol oor haar en ’n vriendin gegooi en hulle aan die brand
gesteek het, het die hooggeregshof in Palm Ridge aan die Oos-Rand gister
gehoor.
Kirsty is in Oktober 2011 aan brandwonde en
veelvuldige orgaanversaking dood. Bronwyn Grammar (destyds 14) het oorleef, maar
gruwelike letsels aan haar rug, keel, arms en hande oorgehou.
Isha Harvey (24), Robin Harwood (19), Courtney
Daniels (18) en Lindon Wagner (23) staan tereg op aanklagte van moord, poging
tot moord en aanranding met die opset om ernstig te beseer. Al vier ontken
skuld.
Jeremy King en Lester Moody (albei 19) het in
2012 skuld beken en is ingevolge ’n pleitooreenkoms elk tot 17 jaar tronkstraf
gevonnis waarvan vyf jaar opgeskort is.
Adv. Lydia van Niekerk, vir Wagner, het gesê
die vriende het drie weke voor die aanval gesprekke oor satanisme en offers
gehad. “Niemand het satanisme werklik verstaan nie en het bespreek hoe dit
gedoen moet word. Moody sou glo ’n soort formule hê. ’n Nommer sou in die vorm
van ’n naam na hom toe kom van dit wat geoffer moet word.”
Hulle was nuuskierig, het Van Niekerk gesê,
maar Wagner het dit as ’n grap gesien, al het hulle beplan om ’n Bybel te
verbrand.
In Wagner se verklaring wat eergister
voorgelees is, het hy beweer Kirsty het gevra om geoffer te word.
Van Niekerk het Bronwyn onder kruisverhoor
gevra of sy ’n brief ter verskoning van Wagner se dade sal aanvaar. “Ek het nie
die moeite gedoen om dit te lees nie en ek gee nie om nie,” het Bronwyn gesê. Sy
het regter Geraldine Borchers gevra of sy haar gebrande lyf aan haar aanvallers
kan wys, maar Borchers het gesê dit sal onvanpas wees.
Landdros Kalla Fourie het getuig Harwood het
kalm aan hom beken hoe Kirsty aangerand is.
“Ek het gehelp om die meisie vas te druk en het
haar gewurg sodat sy aan die brand gesteek kan word,” het Harwood volgens Fourie
gesê. “Ek was ’n getuie toe hulle (Kirsty en Bronwyn) met petrol gegooi en aan
die brand gesteek is. Ek het daarna van die toneel gevlug.”
Adv. Gail Sidwell, vir Harwood, het gesê vir
hom het alles soos ’n droom gevoel, asof hy geen wilskrag gehad het nie.
- Samantha Grammar, Bronwyn se ma, het die media gevra om haar
dogter te eien, al is sy minderjarig: “Sy is Bronwyn Grammar, sy wil hê mense
moet weet.”
Rand - Dollar
19.03
-0.1%
Rand - Pound
23.79
+0.0%
Rand - Euro
20.41
+0.0%
Rand - Aus dollar
12.42
-0.2%
Rand - Yen
0.12
+0.3%
Platinum
930.50
+0.5%
Palladium
994.50
+0.4%
Gold
2,336.18
+0.2%
Silver
27.58
+0.6%
Brent Crude
89.01
+1.1%
Top 40
68,437
0.0%
All Share
74,329
0.0%
Resource 10
62,119
0.0%
Industrial 25
102,531
0.0%
Financial 15
15,802
0.0%
All JSE data delayed by at least 15 minutes