Die Helderberg, ’n Boeing 747 Combi, het op 28 November 1987 met 159 passasiers en bemanningslede aan boord naby die kus van Mauritius in die see gestort. Mev. Retha Machlup was een van die passasiers.
Die oorsaak van die ramp is nooit vasgestel nie, maar daar is wyd bespiegel dat die destydse regering plofbare materiaal onwettig vervoer het. Daar was ’n vinnige en hoë-intensiteit-brand in die bagasieruim.
Die bandopnames van die gesprek tussen die lugverkeersentrum op die destydse Jan Smuts-lughawe en die stuurkajuit net voordat die vliegtuig neergestort het, het ná die ramp “verdwyn”.
Kapt. Clair Fichardt van Rondebosch, Kaapstad, ’n afgetrede SAL-lid, het gister bekend gemaak dat hy ’n verklaring afgelê het dat kapt. James Deale, ’n oudkollega, voor sy dood aan hom gesê het hy het die bande gevat.
Volgens Fichardt het Deale vertel hy het die bande in die teenwoordigheid van mnr. Gert van der Veer, destydse SAL-hoof, en mnr. Ardie Malherbe, ’n regsverteenwoordiger, aan kapt. Mickey Mitchell, destydse hoofkaptein van die SAL, gegee.
Mitchell is sowat ’n maand gelede oorlede en Deale ’n paar jaar gelede.
Fichardt het die verklaring afgelê op aandrang van dr. David Klatzow, ’n forensiese ondersoeker.
Volgens Klatzow is Fichardt se verklaring ’n belangrike stuk om die legkaart van die Helderberg-ramp te voltooi. “Ons het almal geweet die sogenaamde ZUR-bande het verdwyn, maar nou het ons uit die binnekringe bevestiging van wat daarmee gebeur het,” het Klatzow gesê.
Van der Veer, wat destyds voor die Margo-kommissie van ondersoek na die ramp getuig het en ook voor die Waarheid-en-versoeningskommissie, het gister per SMS laat weet: “Ek het niks om by te voeg nie. Indien iemand iets kan toevoeg, is dit sy plig om dit oor te dra. Ek is nie bereid om op enige gerugte te reageer nie. Daar is naasbestaandes wie se gevoelens gerespekteer moet word.”
Machlup het gister gesê: “Ons weet die huidige en vorige regering steek goed weg oor wat op daardie vliegtuig was. Ons lewens gaan aan, maar die waarheid oor wat presies gebeur het, sal alles afsluit.”
Klatzow het gistermiddag met regsverteenwoordigers gepraat oor of die verklaring moontlik kan help om die owerhede of individue te dwing om meer inligting bekend te maak.
Volg Beeld op Facebook en Twitter.