“Oor tien jaar moet daar wit huisbediendes wees,” het Malema gister in Thaba Nchu aan meer as 1 000 mense in ’n skoolsaal gesê.
Malema het gepraat op ’n geleentheid wat deel uitmaak van die ANC-eeufees die naweek in Bloemfontein.
“Huisbediendes word in die baas en madam se slaapkamer verkrag, maar kan niks sê nie omdat hulle hul werk sal verloor,” het hy gesê.
Oor die feit dat net pres. Jacob Zuma Sondag ’n toespraak sal hou en geen ander alliansie- en liga-leier nie, het Malema gesê Zuma praat namens die ANC.
“Hier is ek in Mangaung en ek praat met julle. Zuma kan maar Sondag praat.”
Met verwysing na sy skorsing het Malema gesê mense maak foute en “leiers” moenie dan dreig met tugoptrede nie.
“Jy dink jy kan mense vir vyf jaar skors, hulle op die kantlyn skuif en nog langer stil hou deur ’n appèlverhoor. Jy kan nooit ’n revolusionêr onderdruk nie!”
Hy het weer uitgevaar oor banke, myne en grond wat in wit besit is.
“Die media moenie vir my sê ek besit grond nie. Ek besit net ’n stukkie grond.”
Hy het oudpres. Nelson Mandela geloof en gesê dit is vanweë sy visioenêre leierskap dat die ANC sy beleid van vreedsame verset laat vaar het.
“Mandela het gesê dit help nie om briewe te skryf aan die koningin van Engeland nie. Hý het gesê ons moet die wapen opneem.
“Dieselfde moet vandag gebeur as ons ekonomiese vryheid wil hê.”
Ná Malema het mnr. Fikile Mbalula, minister van sport, die ANC ook gekap.
“Die jeugliga is ’n outonome organisasie en ’n militante organisasie. Die moederliggaam moet dit nie probeer verander nie. Hulle sal dit nie regkry nie.”
Mbalula het Malema geprys.
“Daar was baie jeugleiers voor Malema en hulle het groot leiers geword. Hulle het almal deur die prosesse tot bo gekom. Hoekom kan Julius nie?”
Oor die meer as R100 miljoen wat die ANC-eeufees kos, het Mbalula gesê geld is nie ter sprake nie.
“Wat is R100 miljoen? Geld is f*kol!”
Ná die vergadering het die skare aanhoudend “Skiet die Boer” gesing terwyl Malema en sy trawante “shoot to kill, kiss the Boer” gesing het.
Voordat Malema opgedaag het, het die skare gesing “Malema bid vir ons, ons ly. Die stort gee ons probleme.”