Siphiwe Dlamini, weermag-kommunikasiehoof, het gister bevestig genl. Solly Shoke, hoof van die weermag, het opdrag gegee dat die weermag se inspekteur-generaal die aanstelling van lt.kol. Danny Dinah as bevelvoerder van die Transvaal Scottish-regiment ondersoek.
Die ondersoek kom nadat Beeld navraag gedoen het oor Dinah se kwalifikasies en reputasie voordat hy as bevelvoerder aangestel is.
Dinah is die tweede van 14 nuwe aanstellings van bevelvoerders by die weermag se deeltydse regimente as deel van dié regimente se “transformasie”.
Dinah was voorheen ’n sersant-majoor in die regiment voordat hy weens beweerde swak prestasie verplaas is. Hy het later, sonder dat hy offisiersopleiding ondergaan het, ’n offisier en kompaniebevelvoerder geword.
Dit was sy kompanie se soldate wat twee jaar gelede tydens ’n ontplooiing op die Mosambiekse grens een aand laat in ’n skietery in ’n sjebien met soldate van die Mosambiekse weermag slaags geraak het.
Een van die Suid-Afrikaanse soldate en twee Mosambiekers is doodgeskiet.
Dinah is daarna as kompaniebevelvoerder van sy magte onthef.
Volgens sy kollegas by die regiment het hy sedert sy aanstelling in Augustus verklaar dat hy nie die regimentele drag van Transvaal Scottish met Skotse rompie en gepluimde hooftooisel en al sal dra nie.
Hy het sonder enige toestemming glo opdrag gegee dat dié drag met gewone kamoefleer-uniforms en ’n groen pet vervang sal word.
Hy het ook van sy langsdienende offisiere by die regiment ontslae geraak deur hulle 24 uur kennis te gee.
Dinah se aanstelling is in die kollig kort ná dié van lt.kol. Sibusiso Mbuyazi van Durban Light Infantry, wat kort ná sy aanstelling uit sy pos verwyder is. Hy het glo die medaljes van ’n gestorwe kapelaan gedra.
Dlamini het ontken dat Dinah iets teen sy regiment se tradisionele drag het.