Muldersdrift is nie een van dié gebiede nie.
Genl.maj. Phumzo Gela, provinsiale adjunkpolisiehoof, het tydens ’n onlangse besoek aan Muldersdrift, ’n gebied sowat 380 km², gesê die misdaadbeleg daar is erg, maar dit is nie onder die vyf polisiegebiede wat die ergste onder misdaad deurloop nie.
Volgens misdaadstatistieke vir 2011-’12 is dié vyf Johannesburg-Sentraal, Hillbrow, Pretoria-Sentraal, Honeydew en Booysens. 63 382 misdade is daar aangemeld – 10,94% van alle misdade in Gauteng vir dié boekjaar.
Vir doeleindes van misdaadstatistieke is Gauteng in 138 polisiegebiede verdeel.
Van hulle beklee Muldersdrift slegs die 105ste plek met 1?992 misdade – 0,34% van alle misdaad in Gauteng.
Die gebied loop veral deur onder diefstal, inbraak by huise, roof met verswarende omstandighede en aanranding met die opset om ernstig te beseer.
In die betrokke boekjaar is tien moorde daar gepleeg. Ewe veel moorde is in Naledi (Soweto), Soshanguve, Yeoville, So-phiatown, Vereeniging en Midrand aangeteken.
86 polisiegebiede het hoër moordsyfers.
Een daarvan is Honeydew, wat aan Muldersdrift grens. 19 moorde is in 2011-’12 daar aangeteken, nes in Bronkhorstspruit.
By 58 polisiekantore is meer moorde aangemeld.
Minstens sewe mense is die laaste ses maande in Muldersdrift vermoor. As die moordsyfer vir die 2012-’13-boekjaar hoër as tien is, sal dit die eerste styging in die moordsyfer daar in vier jaar wees.
Nege moorde is in 2011-’12 in Sandton aangemeld, maar met 9 052 aangemelde misdade is dié gebied die negende ergste wat misdaad in Gauteng betref.
Die grootste misdaadprobleem in al die polisiegebiede is diefstal.
Rosebank, Fairland, Tarlton, Magaliesburg en Hekpoort is onder die 25 veiligste polisiegebiede in Gauteng.
Die veiligste polisiegebied in Gauteng is Devon, aan die verre Oos-Rand, waar 317 misdade, of 0,05% van alle misdaad in Gauteng, aangeteken is.
Die misdaadstatistieke verteenwoordig misdade wat by die betrokke polisiekantore aangemeld is.