As dit nie vir JP Wilkinson (15) en sy ouma Louise Borman was nie, het die meisie, ’n leerling aan die Hoërskool Elandspoort, doodgebrand.
JP en Borman het gister omstreeks 03:00 rook uit ’n huis in Paul Roosstraat, Danville, sien kom.
“Ons het gedink dit is tyres wat brand. Toe ons by die huis kom, vra die vrou ons om te help,” het JP gesê.
Volgens hom was die huis en die meisie aan die brand. Die meisie se ouma het die brandweer probeer bel, maar haar foon wou nie werk nie.
“Ek wou die mense help en toe hardloop ek na die brandweer toe wat nie te ver is nie (twee straatblokke). Toe ek daar kom, sê ek vir hulle hulle moet gou kom help, ’n huis brand af,” het JP gesê.
Intussen het Borman die gesin probeer help. Sy het besef die meisie is aan die brand en vir haar gesê sy moet buitentoe gaan. Die brandweer het die vlamme geblus en die meisie is per ambulans na die Eugène Marais-hospitaal geneem.
Volgens haar pa is die meeste brandwonde aan haar middellyf.
“Ek weet nie wat het gebeur nie. Ek is so verbaas,” het hy gesê.
JP se ma, Martie Wilkinson, het gesê die meisie het vir háár ma en ’n brandweerman gesê sy het brandspiritus oor haarself gegooi en haar aan die brand gesteek.
“Sy het gesê sy wil nie meer lewe nie,” het Wilkinson gesê.
Die meisie se twee jonger broers is ongedeerd. Haar ouma is weens rookinaseming hospitaal toe geneem.
Volgens Johan Pieterse, woordvoerder van die Tshwane-nooddienste, het die huis redelik gebrand en ondersoek hulle die oorsaak.
“As dit nie vir my was nie, was sy dood. Ek het gesien die mense sukkel en wou hulle help,” het JP trots gesê.