Drie huisrowers wat ’n man in ’n rolstoel oorval en aangerand het, is gister deur die Vanderbijlpark-polisie op heterdaad betrap en gearresteer.
Dít danksy ’n wakker buurvrou wat gesien het hoe die rowers oor ’n heining spring.
Die buurvrou het die Vanderbijlpark-polisie en die Vaalrand-blitspatrollie dadelik gebel.
“Die drie het oor ’n muur in Wellstraat gespring en deur ’n oop agterdeur toegang tot die huis verkry. Die rowers het ’n 21-jarige man en sy 48-jarige oom, wat in ’n rolstoel is, oorval en aangerand.
“Hulle het selfone en kontant geëis,” het ao. Kinnie Steyn van die Vanderbijlpark-polisie gesê.
“Die verdagtes wou nog vlug, maar is deur die polisie aangekeer en gearresteer.”
Die polisie het beslag gelê op ’n 9 mm-pistool en ’n rewolwer.
