Sport24 het die dokument van vier bladsye gisteroggend bekom, en daarin word nege klagtes geopper. ’n Senior amptenaar, wat uit vrees vir intimidasie anoniem wou bly, het aan Sport24 gesê die grootste besware gaan oor beweerde nepotisme en rassisme.
“Hierdie mosie het die steun van talle senior klubs, wat keelvol is vir hoe dinge in die Boland gedoen word,” het hy gesê.
Daar heers skynbaar al lank ontevredenheid in die Boland oor die “skaamtelose aanstelling van vriende en familie in poste, wat terselfdertyd met buitensporige salarisse gepaardgaan”.
Die oorspronklike renons het glo ontstaan toe Davids sy broer, Abe, verlede jaar as hulpafrigter van die Kavaliers aangestel en sy seun, Franzel September, die span mettertyd begin lei het.
Dít het die Boland vanuit klubgeledere die bynaam “Huis van Davids” besorg – ’n verwysing na ’n plaaslike televisiereeks.
Toe die direkteur van rugby, Loffie Eloff, en talle van sy spelers onlangs aansienlik kleiner salarisse aanvaar het, het September na bewering ’n verhoging gekry.
En, word in die mosie aangevoer, is Bolla Conradie en Milroy Isaacs nie weer gekontrakteer nie om mededinging om onderskeidelik die leierskap en nr. 6-trui van September te voorkom.
Voorts wys die mosie daarop dat Denver Pienaar, ’n voormalige hoof van ontwikkeling en spanbestuurder van die Kavaliers, glo in 2010 aangesê is om teen ’n kleiner vergoedingspakket tussen die twee poste te kies.
Hy het by ontwikkeling aangebly aangesien hy glo net R2 000 per maand as spanbestuurder gekry het. Hendrik Snyders het as spanbestuurder oorgeneem, en toe hy die unie verlaat het, is Willie Small, “’n groot vriend van die president”, in albei Pienaar se vorige poste aangestel.
Die uitvoerende hoof, Piet Bergh (61), is vandeesmaand gevra om ’n jaar voor sy voorgenome aftrede sy pakket te vat.
Dié aankondiging is oombliklik opgevolg met gerugte dat Small die gunsteling is om hom te vervang.
Small het in 2010 sy pos as uitvoerende hoof van die Suidwestelike Distrikte verlaat, toe daar ernstige vraagtekens oor sy kop gehang het oor onder meer beweerde onverklaarde finansiële transaksies.
Hy het in 2009, midde-in ’n tugverhoor teen hom, ’n magdom klubs gesnoer om ’n mosie van wantroue in te dien teen die bestuurslede wat hom verhoor het.
Sport24 verneem dat die SWD se finansiële jaarstate vir 2009 eers volgende week goedgekeur kan word.
Buiten vir kommer “dat hierdie man nou as die Boland se Messias geoormerk word”, meen die Bolandse mosieleiers dat daar geen deursigtigheid in die aansoekproses is nie, aangesien aansoeke direk aan Davids se persoonlike assistent, Anthea Jantjies, gestuur moet word.
Sy is glo onlangs in hierdie nuwe pos aangestel. Haar man, Hoban Jantjies, is na bewering sonder ’n tenderproses as die unie se amptelike spysenier “aangestel”.
Wat rassisme betref, lui die mosie: “Dit is ’n ope geheim dat die president geen blankes in die Boland wil hê nie. Loffie Eloff moet weggewerk word sodat die president se broer, Abe, hoofafrigter van die Kavaliers kan word...”
- Die Boland-rugbyunie het teen druktyd nie gereageer op ’n versoek deur Sport24 om kommentaar te lewer nie.