KAAPSTAD. – Drie mense is die naweek in afsonderlike brande in die
metropool dood.
Volgens Wilfred Solomons-Johannes van die stad se rampbestuur het
’n brand gisteroggend die lewe van ’n 19-jarige vrou en ’n 24-jarige man van die
informele nedersetting Taiwan in Khayelitsha geëis nadat die woning waarin
hulle geslaap het aan die brand geraak het.
“Die brand het net voor 03:00 uitgebreek en vier wonings in puin
gelê. Die oorsaak is glo ’n kers wat omgeval het. Nog 16 mense is dakloos
gelaat.”
Solomons-Johannes het gesê Tyrone Saal (26), ’n inwoner van
Parkwood naby Grassy Park, is Saterdag in ’n brand dood.
“Hy was vasgevang in ’n slaapkamer en kon nie betyds uitkom
nie.”
Meer as 40 mense is die naweek weens brande dakloos gelaat.
Malwande Giba van Khayelitsha, wie se huis tot op die grond
afgebrand het, het gesê môre gaan ’n donker Kersdag wees. Hy was ten tyde van
die voorval nie by sy blyplek nie.
“Ek kon ongelukkig niks van my eiendom red nie.”
Giba het gesê hy het ook ’n haarsalon uit sy woning bedryf.
“Vir my is dit ook ’n verlies aan inkomste.”
