Publications
Partners
Paarl - ’n Belastingbedrieër het gister skuld beken op 84 aanklagte van bedrog wat bykans R7miljoen beloop.
Marius van der Westhuizen (64) het aanvanklik in die Paarl-streekhof skuld ontken. Hy het boonop aangevoer die ondersoekbeampte, mnr. Fred Botha, het gedreig om hom “te ruïneer” en het die klaer, mnr. Oloff Hennig, beskerm.
Van der Westhuizen het van 1999 tot 2005 altesaam 65 vals BTW 201-opgawes met fiktiewe syfers ingedien, waarvoor hy terugbetalings van R6,65miljoen gekry het. Hy was verantwoordelik vir die BTW-verpligtinge van die Oloff Hennig Boerdery Trust en die Stawelklip Landgoed Eiendomstrust. Die ondernemings behoort aan Hennig.
“Ek erken dat mnr. Oloff Hennig nie bewus was van hierdie bedrog nie,” lui die dokument met Van der Westhuizen se erkennings wat sy prokureur, mnr. Henk Carstens, gister aan die hof voorgelees het.
Dié twee ondernemings was tydens die misdade dormant, maar Van der Westhuizen, mede-eienaar van die rekenmeestersfirma A. van der Westhuizen en Kie, het hom voorgedoen as die ondernemings se rekenmeester en het fiktiewe BTW-opgawes by die Suid-Afrikaanse Inkomstediens (SAID) ingedien. Hy het gister erken hy was nie by magte om finansiële state namens dié entiteite in te dien nie.
“Ek erken dat ek alleen hierdie bedrog beplan en uitgevoer het,” lui sy erkennings. Hy het die SAID se uitbetalings van die ondernemings se bankrekenings na sy eie oorgeplaas.
“Die geld is daarna tot my en my besigheid se voordeel aangewend. Ek erken dat ek alleen voordeel getrek het uit hierdie bedrog,” lui die erkenning voorts.
Hy het ook in 2000 ’n SAID-ouditeur, me. Riana Vogel, “wederregtelik, valslik en met die opset om te bedrieg” mislei tydens ’n oudit van die Oloff Hennig Boerdery Trust.
Die staatsaanklaer, mnr. Freek Geyser, en die streeklanddros, me. Norma Smile, het dié erkennings aanvaar. Smile het Van der Westhuizen skuldig bevind. Sy vonnisverrigtinge sal vandag begin en sy borgtog van R1 miljoen is verleng.
