Toetsrugby in die Kaapstad-stadion.
Dít is waarvoor rugbyliefhebbers moontlik reeds aanstaande jaar hul lippe kan aflek.
As die operateur van die stadion, Sail Stadefrance, sy sin kry, sal die Springbokke reeds in 2011 ’n Drienasies-toets teen die All Blacks of Australië in dié stadion speel. Dit is egter ’n ope vraag of die Westelike Provinsie-rugby-unie daarvoor te vinde sal wees.
Volgens mnr. Morné du Plessis, voorsitter van Sail Stadefrance, is die stadion die perfekte plek vir so ’n wedstryd. “Meer toeskouers (as by Nuweland) kan verwag word. En met die Lekkerlooproete wat weer in gebruik geneem gaan word, kan dit ’n uitstekende geleentheid vir Kaapstad en sy mense wees.”
Hulle wil met die Suid-Afrikaanse Rugbyunie (Saru) en die WP-rugbyunie in gesprek tree om groot wedstryde soos Drienasies-toetse in die Kaapstad-stadion aan te bied.
Die uitvoerende hoof van die Westelike Provinsie-rugbyunie, mnr. Theuns Roodman, het egter daarop gewys dat die unie die alleenreg het om groot rugbywedstryde in die provinsie aan te bied. Nuweland is die WP-rugbyunie se tuisveld en sal dit bly.
“Indien daar wel ’n toets in die Kaapstad-stadion gespeel word, sal ons as unie die besluit moet neem. Goedkeuring moet van die WP-rugbyunie gekry word voordat enige groot wedstryd in dié provinsie op ’n ander plek as Nuweland gespeel kan word.
”Du Plessis het vroeër gesê hulle wil ook graag die sewes-toernooi van die Internasionale Rugbyraad in die Kaapstad-stadion aanbied. Roodman het koue water op dié plan gegooi en gesê die WP-rugbyunie het reeds aansoek gedoen om die toernooi vir die volgende paar jaar op Nuweland aan te bied.
Roodman het gesê hoewel hulle oop is vir voorstelle oor sekere wedstryde in ander stadions, kan hy die versekering gee dat Nuweland steeds die tuiste van WP-rugby sal bly. Hulle beplan nie om na die Kaapstad-stadion te verskuif nie.
“Nuweland is sinoniem met die WP-span. Ons gaan dit nie nou verruil vir ’n ander plek nie.”