Kaapstad
Die Wysigingswetsontwerp op Intellektuele Eiendom, wat volgens regskenners erge gevolge vir die gebruik van inheemse kuns en artefakte kan inhou, is vir eers van die parlementêre ordelys verwyder.
Die Nasionale Vergadering sou vandag oor die wetsontwerp stem nadat die ANC-meerderheid in die parlementêre portefeuljekomitee oor handel en nywerheid verlede week omvattende en omstrede veranderings – wat Suid-Afrika uit tred met wêreldneigings kan plaas – deurgedwing het.
Een van die mees omstrede bepalings is dat mense wat inheemse ontwerpe of liedere gebruik, terugwerkend beboet kan word indien ’n inheemse groep ’n lied of ontwerp opeis, al was daardie lied of ontwerp nie as inheems geklassifiseer toe die gebruiker dit begin gebruik het nie.
Die tydelike verwydering van wetgewing van die parlementêre ordelys is hoogs ongewoon.
Dit gebeur net in gevalle van uiterste omstredenheid, wanneer ’n oordeelsfout in ’n wetsontwerp reggestel moet word.
In reaksie daarop het mnr. Tim Harris, DA-LP, gesê die uitstel van die stemmery oor die wetgewing bied die geleentheid om foute daarin reg te stel en dit word verwelkom.
Die verwagting is dat die wetsontwerp na die portefeuljekomitee terugverwys sal word sodat parlementslede die problematiese dele kan herskryf.