Oudtshoorn - Wynand “Windpomp” Burger, die sanger wat verlede jaar tydens die Absa KKNK aangekla is van verkragting, is gister bykans ’n jaar later onskuldig bevind.
Me. Yolande Eybers (25) van Hartenbos het beweer Burger het haar in die vroeë oggendure van 4 April in ’n tentdorp op die skouterrein verkrag.
“Geen sodanige getuienis bestaan nie en die beskuldigde word hiermee onskuldig bevind,” het streeklanddros Daniel Boks in sy uitspraak gesê.
“Die verdediging het reeds tydens die eerste sessie vir kruisondervraging voorgehou hy sal aanvoer dat seksuele omgang met toestemming geskied het.
“Sy het hom binnegenooi. Sy het niks gedoen om hom te stop nie.”
Eybers was die staat se eerste en enigste getuie wat geleentheid gekry het om te getuig.
“Tydens hofondervraging het die staatsaanklaer die aspek aangeraak van die blanks wat nie in die klaer se verklaring aan die polisie genoem is nie.
“Tydens kruisondervraging deur mnr. Christo van der Bergh, vir die verdediging, is sy gekonfronteer met haar getuienis en dit het geblyk dat sy vier keer blanks beleef het en belangrike aspekte nie kon onthou nie.
“Sy het drie weke later gesit en dink en ’n afleiding gemaak oor die blanks. Sy was nie seker dat sy verkrag is nie en dat sy tot seks kon ingestem het nie. Sy kon tydens die blanks ja gesê het.
“Sy het eers besef sy kon verkrag gewees het toe hy agterna langs haar lê en snork.”
Volgens die staatsaanklaer, me. Michelle Weyers,het die direkteur van openbare vervolging besluit ’n aansoek om ontslag sal nie teengestaan word nie omdat daar nie voldoende getuienis is nie.
Burger het buite die hof gesê hy sal weer van voor af aan sy sangloopbaan moet begin werk.
“Ek het geen optredes meer gekry nie. Ek wou verlede jaar ’n CD by die KKNK bekend gestel het, maar toe sit ek in die tronk. Ek is nou besig met nog ’n CD,” het hy gesê.
Hy is nog nie seker of hy vanjaar by die KKNK gaan wees nie.