Sunday Morning
Kalkbaai-teater, Kalkbaai
****
’n Plesierige nadraai van die Nasionale Kunstefees op Grahamstad is dat die Kaapse teaterbase daarvoor sorg dat diegene wat nie daar kon wees nie, darem ook kans kry om van die room af te skep.
Simon Cooper, eienaar van die Kalkbaaiteater, is lief om te vertel hoe lank hy al sukkel om die voorste fisieketeater-akteur James Cuningham weer hier te kry. Plaaslike gehore ken dié Gautengse akteur danksy skitter-optredes in juweeltjies soos Jutro, Baobabs Don’t Grow Here en Black and Blue.
Vir sy huidige solostuk, Sunday Morning, gebruik Cuningham die kreatiewe span wie se solostuk Dirt (met James Cairns) met groot sukses in dieselfde teater opgevoer is. Nick Warren, skepper van die puik teks, werk in die advertensiewese en is al jare lank ’n professionele skrywer. Sy vrou, Jenine Collocott, ook ’n skrywer en teaterskepper, is die regisseur.
In Sunday Morning is die fotograaf Mat (Cuningham) se lewe is presies soos hy daarvan hou: ongekompliseerd, gerieflik en georden. Tot een Sondagoggend wanneer sy lewensmaat, Suzie, hom met ’n brokkie nuus konfronteer wat dinge potensieel heeltemal deurmekaar kan krap. Hy besluit om ’n ent te gaan draf om sy kop skoon te kry. Hy verdwaal, beland in ’n deel van Johannesburg wat hy nie ken nie en net daar gebeur iets wat hul lewe onherroeplik sal verander.
Sunday Morning word aangebied in die styl van théâtre pauvre, oftewel “arm teater”. Dit beteken jy kom klaar met wat jy het. Met ’n akteur soos Cuningham is ’n minimalistiese stel en so te sê geen rekwisiete nie allermins ’n probleem.
Soos ’n verkleurmannetjie wat op herfsblare rondloop gly hy moeiteloos van die een luim na die ander en lewer elke woord met presies die regte gevoelswaarde. Hy skep beelde wat jou laat voel jy is binne in sy kop en sien wat hy sien, beleef wat hy beleef, voel wat hy voel. Daarom is jou meelewing sonder skroom of voorbehoud.
Sunday Morning is ’n diep menslike storie wat met eenvoud oorgedra word. Maar as jy James Cuningham het, is daar in elk geval oorvloed.