Kaapstad
Dit was ’n lang wag vir die finaliste van Maskew Miller Longman (MML) se letterkundepryse.
Die sperdatum in dié wedstryd, gemik op tieners en jong volwassenes, was al in April verlede jaar. Meer as 150 manuskripte in al 11 landstale is ontvang. Die finaliste het egter ’n rukkie gelede eers gehoor wie op die kortlys is, omdat deel van die prys is dat hul boeke deur MML uitgegee gaan word. Gistermiddag, by die prysuitdeling in Kaapstad se ou stadsbiblioteek, het hulle egter uitgevind wie wen en kon hulle ook hul boeke, vars van die drukkers af, vashou.
Die oomblik was die wag werd– veral vir Maya Fowler, wat die Afrikaanse kategorie gewen het. Dit is die eerste keer dat Fowler wen, nadat sy in 2009 op die kortlys was van die Herman Charles Bosman-prys vir haar debuut, The Elephant in the Room (Kwela), én die Sanlam-prys met Detour.Detour het vanjaar in Afrikaans verskyn as As jy ’n ster sien verskiet(Tafelberg).
Fowler is bekroon vir Om op eiers te dans, ’n storie wat hom afspeel op ’n Karooplaas waar ’n seun in opstand kom teen sy bitter, manipulerende ma en afwesige pa. Die keurder Riana Scheepers het gesê sy was “met die wegspring baie beïndruk met dié verhaal”.
Vanjaar was daar in vyf kategorieë wenners. Oor die Sepedi-wenner was die beoordelaars veral opgewonde. Herbert Lentsoane se Tshweu ya ditsebe gaan oor ’n albinoseun wat deur sy pa verwerp word – net om jare later met hom herenig te word. Prof. Moloko Sepota het dit een van die boeiendste boeke genoem wat hy tot nog toe gelees het.
Jayne Bauling is die Engelse wenner met Stepping Solo, oor ’n gr.11-seun wat die hoof van sy klein huishouding is. Ander wenners is Ezra Mcebisi Nkohla in Xhosa en Sello Mokua in Tswana, met Mabonchi Goodwill Motimele en Othusitse Moses Lobelo as finaliste in onderskeidelik die Sepedi en Tswana-kategorie. ’n Reeks slypskole word jaarliks onder die vaandel van die prys aangebied. Rachelle Greeff was dié slag die mentor.
Die wenners kry R10000 elk, en die twee finaliste R5000.