News24

Dié aandeel of ses verskil van res

2010-08-01 02:00
Johannesburg. - Sanlam iTrade het pas ’n reeks seminare in samewerking met Sake24 aangebied waar beleggers touwys gemaak is oor hoe om in aandele te belê.

Portefeuljebestuurders het op al die seminare verduidelik wat tans op die aandelemark aangaan, en in watter aandele hulle belang stel.

Mnr. Alwyn van der Merwe, Sanlam Private Beleggings se direkteur van beleggings, het ses aandele uitgesonder wat hy dink tans goeie waarde bied.

Die aandele waarvan Sanlam Private Beleggings tans hou, is nie noodwendig almal beleggers se gunstelinge nie.

Een van die aandele is die meubelgroep Lewis, maar Van der Merwe sê beleggers se afkeer van die aandeel is heeltemal oordrewe. Hy meen die aandeel bied tans baie goeie waarde en daar is ’n sterk moontlikheid van ’n sikliese herstel in verdienste.

Op grond van sy prys-verdienste-veelvoud (p/v) verhandel Lewis tans teen ’n diskonto van 44% teenoor die indeks van alle aandele en teen ’n dividendopbrengs van 5,1%, wat 1,5 keer hoër as die res van die mark is.

Daar word ook ’n sterk ommeswaai in verdienste verwag nadat die maatskappy se verdienste tussen die einde van 2008 en begin van 2010 vir drie tydperke van ses maande verswak het.

Die verwagtinge van ’n ommeswaai is gegrond op die opgehoopte vraag van verbruikers na duursame goedere nadat die resessie huishoudings gedwing het om sulke aankope uit te stel.

Die omgewing vir die invordering van skuld het ook verbeter weens die laer koste om skuld te delg, wat ’n laer skuldlas vir verbruikers is.

Kleinhandelverkope is ook besig om te styg en het in Mei met 4,6% in reële terme toegeneem, meer as wat verwag is.

Die jongste inligting wat Lewis bekend gestel het, is ook bemoedigend, veral omdat meubelverkope met 17% gestyg het.

Nog so ’n aandeel is Basil Read, wat ook teen baie aantreklike waardasies op ’n historiese en relatiewe grondslag verhandel.

Teen ’n p/v van 3,9 verhandel die aandeel teen ’n diskonto van 78% teenoor die indeks van alle aandele en het hy ’n dividendopbrengs van 3,1%.

Die lae waardasies weerspieël die mark se kommer oor die maatskappy se toekomstige verdienste-vooruitsigte noudat die groot projekte vir die Wêreldbeker-sokkertoernooi afgehandel is.

Van der Merwe sê hy stem hiermee saam, maar hy meen die mark verdiskonteer tans die slegste moontlike scenario.

Toekomstige verbeterings in verdienste kan dus ’n katalisator vir toekomstige stygings in die aandeelprys wees.

Steinhoff het ’n relatief defensiewe sakemodel omdat hy hoofsaaklik met die massamark vir meubels en huishoudelike toebehore sake doen, terwyl die onderneming ook baie goed vertikaal geïntegreer is. Hy is onder meer betrokke by vervaardiging, kleinhandel en logistiek.

Dié aandeel bied ook goeie geografiese diversifikasie met bedrywighede regoor die wêreld, wat veral aantreklik is wanneer die rand sterk is.

Die aandeel se waardasies is ook baie aantreklik. Sy historiese p/v van 7,9 is op een na die goedkoopste van al die aandele in die top-40-indeks.

Exxaro se aandeelprys was die jongste ruk onder druk, maar dit is na Sanlam se mening oordrewe. Gegrond op konsensusvoorspellings oor toekomstige verdienste verhandel die aandeel tans ’n verwagte p/v van net 6 in 2012 teen die huidige prys.

Goeie ysterertsbelange, ’n hele reeks steenkoolprojekte met die Medupi-kragstasie as fokus, waarskynlike kostebesparings en die moontlikheid van ’n ommeswaai in die afdeling vir swaar minerale maak alles teen die huidige waardasies ’n goeie saak uit vir ’n belegging in dié maatskappy.

Van der Merwe hou ook van Investec omdat hy goeie waarde bied vergeleke met die ander banke.

Die verhouding tussen die aandeelprys en die tasbare boekwaarde is 1,65 en die konsensus oor verdienste dui op ’n p/v van 6,9 oor twee jaar teen die huidige prys.

Sterk groei in die inkomste van sy kern-verhandelingsaktiwiteite het daartoe gelei dat die wins nie in duie gestort het nie toe die privatebankbedrywighede in die ekonomiese afswaai onder erge druk was.

Die privatebank-afdeling het nou die geleentheid om sy winste vanaf ’n lae basis te herstel as aktiwiteite toegeneem en slegte skuld minder van ’n probleem word.

Die suksesvolle batebestuursafdeling gaan na verwagting sy inkomste verder verhoog omdat die bestuur die afdeling as al hoe belangriker beskou.

MTN se aandeel is al lank ’n langtermynbelegging in Sanlam se portefeulje en het goed gevaar omdat sy verdienste vinniger as die res van die mark gegroei het.

Sanlam glo steeds in die maatskappy se groeivooruitsigte in Afrika, waar hy ’n dominante rolspeler in verskeie ekonomieë is.

Die bestuur se onlangse aankondiging dat die dividendbetalings verhoog gaan word, word ook verwelkom.