Awukho ugcobho ngokufa komholi - Amaphoyisa

Gaborone - Uphenyo lwamaphoyisa aseBotswana ngokufa komholi weqembu eliphikisayo, uGomolemo Motswaledi, seliveze ukuthi wawungekho ugcobho ngengozi eyadlula nomphefulo wakhe.

UKhomishana wamaPhoyisa uKeabetswe Makgophe ngoLwesithathu ukhiphe isitatimende esicacisa ngale ngozi eyehlela uNobhala Jikelele we-Umbrella for Democratic Change (UDC) ngomhlaka-30 kuJulayi.

Kuthiwa iqembu i-UDC lizwakalise ukungenami ngalo mbiko kwazise lona lisola ukuthi kukhona isandla semfene kule ngozi.

“Uphenyo luveze ukuthi uMnu Motswaledi washona engozini yomgwaqo, akukho lapho kukhombisa ukuthi kukhona ugcobho ngale ngozi,” kusho uMakgophe kwisitatimende.

UMakgophe uthe babone kungcono bayimemezele emphakathini imiphumela yophenye ngoba bese kunezinkulumo ezisho okunye ezinkundleni zokuxhumana.

Leli qembu lisola ukuthi uhulumeni uyathinteka ngokufa kwalo mholi njengoba lithi abukho ubufakazi obukhombisa ukuthi imoto yagingqika.

IBotswana kulindeleke ukuba ibe nokhetho lukazwelonke ngomhlaka 24 Okthoba kulo nyaka.

   - “Like” ikhasi lethu kuFacebook ukuze uthole izindaba ngolimi lwakho

       - Landela IzindabaNews24 kuTwitter