Harare – UMengameli weZimbabwe National Students Union (Zinasu) uGilbert Mutubuki usehlanganise intsha ukuthi kube khona ekwenzayo ngodlame olubhekiswe kwabokufika eNingizimu Afrika ngokuba iziphindiselele ngokuhlasela amabhizinisi aseZimbabwe.
IZinasu yibhodi elikhulu labafundi eliseZimbabwe elimela abafundi abayizinkulungwane kuwo wonke amanyuvesi namakolishi ezweni.
Kubulawe abantu abahlanu kubalwa nomfana osekhulile kwaboshwa abangu-46 selokhu luqalile lolu dlame eNingizimu Afrika.
Abantu bokufika abahlukunyezwayo babalelwa ku-7 000 kuleli bahlezi ematendeni anikezelwe nguhulumeni ukuba bakwazi ukufihla amakhanda.
Ekhuluma nezintatheli eHarare engqungqutheleni ebihlelwe yiZimbabwe civic society, uMutubuki uthe sekuyiso isikhathi sokuba intsha iziphindiselele ngokuba ihlasele amabhizinisi eNingizimu Afrika aseZimbabwe afana noPick n Pay.
OLUNYE UDABA: Kuhlaselwa amaloli akuleli emngceleni iLebombo
"Njengamanje kunamabhizinisi aseNingizimu Afrika asebenza ngenkululeko kodwa abafowethu bayabulawa eNingizimu Afrika.
"Namuhla ekuseni abafundi baseMzansi bahlezi ngokuthula badla isidlo sasekuseni eesikhungweni semfundo ephakeme yaseZimbabwe kodwa abafowethu nodadewethu bayabulawa.
"Sekufanele senze okufanayo nathi kuwo wonke amabhizinisi akuleli aseNingizimu Afrika," kusho uMutubuki.
- “Like” ikhasi lethu kuFacebook ukuze uthole izindaba ngolimi lwakho