IWHO isimemezele ukuthi ayisekho i-Ebola eNigeria

Lagos – Inhlangano yezempilo emhlabeni iWorld Health Organisation (WHO) idalule ukuthi asisekho isifo se-Ebola eNigeria kulandela izinsuku ezingu-42 kungabikwanga muntu onalesi sifo kuleli lizwe. 

Lokhu kulandela ukuthi le nhlangano imemezele ukuthi neSenegal isikhululekile ngalesi sifo.  

Le nhlangano income iNigeria ngendlela elusingathe ngayo udaba lwe-Ebola nokunakekela labo ebese behaqiwe.

OLUNYE UDABA: Ukhishwe endizeni oncokole ngokuthi une-Ebola

Ngokombiko we-eNCA kusukela ngosuku lokuqala kutholakala isiguli sokuqala esihaqwe yile sifo iNigeria yaphuthuma ngamandla ukuhlela izindawo zikugcina abanalesi sifo ngaphambi kokuthi ilungise nendaba yemishanguzo yayo.

IWHO ithe iNigeria yakhombisa ukuba yizwe elikwaziyo ukubhekana nezifo ezingomashayabhuqe ngoba yaze yahlela nocingo abantu abangalishayela uma kukhona abamsolwa ngokuthi uhaqwe yilesi sifo esesibulale abantu abangaphezulu kuka-4 000 emazweni ase-Afrika namaphethelo.  

Le nhlangano iphinde yanxua amanye amazwe ahaqwe yilesi sifo ukuba abukele kwiNigeria nangendlela ebhekane ngayo nalesi sifo.

   - “Like” ikhasi lethu kuFacebook ukuze uthole izindaba ngolimi lwakho

      - Landela IzindabaNews24 kuTwitter