IZambia kumele ibambe ukhetho ezinsukwini ezingu-90

Lusaka – Amazwi enduduzo asalokhu etheleke njalo eZambia ngokudlula emhlabeni kukaMengameli wakhona uMichael Sata.

USata ushonele eLondon lapho ebethola khona ukwelashwa ngemuva kokugula isikhathi eside.

Kubikwa ukuthi uSata obeseneminyaka engu-77 ubudala ushonele esibhedlela iKing Edward VII ngoLwesibili. 

Lo mengameli uzokhumbuleka ngesiteketiso sakhe esithi King Cobra kwazise ubezikhulumela engasabi ukubeka uvo lwakhe kanti inkulumo yakhe yokugxeka izinkampani zangaphandle zezimayini kwamdalela amazinyo abushelelezi kubatshali bezimali.

OLUNYE UDABA: Akasekho uMengameli waseZambia: Umbiko

USata othathe izintambo zobumengameli ngo-2011 beyingakabikwa imbangela yokudlula kwakhe emhlabeni. 

Kuzokhumbuleka ukuthi ubusuqalile umbango wesikhundla sobuMengameli eZambia njengoba uSata ubesaxinekile kanti ngokomthethosisekelo wamazwe kuzomele leli lizwe libambe ukhetho zingakapheli izinsuku ezingu-90 ngemuva kokushona kwakhe. 

Kulesi sikhundla sobumengameli kulindeleke ukuthi obenguNgqongqoshe wezokuVikela u-Edgar Lungu noma uSekela Mengameli walo uGuy Scott kube ngyedwa wabo oqhoqhobala lesi sikhundla.

Uma uScott ephumelela uzoba nguMengameli wokuqala omhlophe e-Afrika kusukela ngo-1994.

    - “Like” ikhasi lethu kuFacebook ukuze uthole izindaba ngolimi lwakho

       - Landela IzindabaNews24 kuTwitter