Mbabane – Zingaphezulu kuka-100 000 izintombi nto ezibuthane esigodlweni seSilo saseSwazini eLudzidzi Royal Palace emcimbini obizwa ngoMkhosi woMhlanga owenzeka minyaka yonke kule ndawo.
Ngokubika kwezindaba ze-SABC isibalo sezintombi senyukile kulo nyaka kanti lo mcimbi usuzakhele udumo nakubantu abaqhamuka nakwezinye izindawo emhlabeni.
Minyaka yonke izintombi nto zibuthana kule ndawo zivunule ziconsa ngegqephu yaseSwazini ziveze amabele.
Lo mcimbi udonsa nezintombi eziqhamuka nakwezinye izindawo zakuleli okubalwa kuzo ezaseMpumalanga naKwaZulu-Natal kanti kulindeleke ukuthi uphele ngoMsombuluko.
Kulo mcimbi kubuthana nezivakashi eziqhamuka naphesheya kwezilwandle ezisuke zizobuka ubuhle bosiko lwaseSwazini.
Khonamanjalo kulindeleke ukuthi uMkhosi woMhlanga weSilo samaZulu uGoodwill Zwelithini ubanjwe kule nyanga esigodlweni eNyokeni kanti nakhona kulindeleke izinkumbi zezintombi nto.
- “Like” ikhasi lethu kuFacebook ukuze uthole izindaba ngolimi lwakho