Maputo – Ikhomishana kazwelonke eyengamele
ukhetho eMozambique ithe isikumisile ukubalwa kwamavoti esifundazweni
esisenyakatho yentshonalanga nezwe kulandela izinsolo zokukhwabanisa.
Ngokombiko besekubalwe amavoti angaphezulu
kwengxenye njengoba ukubalwa kumiswe ngoMsombuluko.
Kubikwa ukuthi ikhomishana ithole amaphepha
okuvota angaphezulu kwesibalo sabantu abebelindelekile ukuthi bavote kulesi
sifundazwe.
OLUNYE UDABA: Aphikisayo asola esemfene okhethweni eMoz
Ngokusho kwenhlangano elwa nenkohlakalo nokukhwabanisa eMozambique iCentre
For Public Intergrity kutholakale amabhokisi agcwele amaphepha okuvota angu-234
ekubeni angu-178 abelindelekile ngokwesibalo sekhomishana.
Ukhetho lwaseMozambique selihlangabezane
nezigameko ezahlukene kusukela ngosuku lokhetho njengoba amanye amalungu
omphakathi ashisa amabhokisi agcwele amaphepha okuvota kulandela ukuthi
ayesemakiwe eduzwe kophawu lwenhlangano ebusayo iFrelimo.
Ngokwemiphumela ebisaphumile kuvele ukuthi
iFrelimo izihola phambili kuleli lizwe ngamavoti angu-62% kanti iRenamo yona ilandela ngemuva ngo-32%
bese kulandela i-MDM ngo10%.
- “Like” ikhasi lethu kuFacebook ukuze uthole izindaba ngolimi lwakho