Kunyamalale inqwaba yabantu kucwila isikebhe

Tripoli - Yinqwaba yabantu abangabafuduki abasanyamalele namanje ngasogweni lwaseLibya ngemuva kokucwila kwesikebhe abebehamba ngaso, kusho okhulumela umbutho wezasemanzini eLibya.

Bangu-36 kuphela abafuduki, okubalwa kubona abesifazane abathathu, abatakulwe esikebheni ebesithwele abantu abalinganiselwa ku-200 olwandle lwaseTripoli ngeSonto, kusho uColonel Ayub Kassem.

"Ziningi izidumbu ezibonakale zintanta emanzini kodwa ngenxa yokungabikho kwezinsiza kusebenza ezanele asikwazanga ukuzikhiphela ngaphandle, ikakhulukazi njengoba besekuqala nokuhlwa,” kusho uKassem.

Funda olunye udaba: Zibekwa ku-14 000 iziboshwa ezeqile eLibya.

"Obekuseqhulwini ukuthi sihlenge labo abebesaphila,” usho kanje.

Njengoba isimo singesisihle ngenxa yezombusazwe, abantu baseLibya bazama ukufudukela e-Europe ngokuthi bawele ulwandle iMediterranean, ikakhulukazi bewelela eNtaliyane.

Esehlakalweni saphambilini, bangu-170 abafuduki abanyamalala bezama ukuwela ulwandle ngesikebhe.

 – "Like" ikhasi lethu ku-Facebook uze ukwazi ukujoyina inkulumo ngolimi lwakho.

 – Landela IzindabaNews24 kuTwitter (@IzindabaNews24).