Harare – Owesilisa waseHarare uxoshe umkakhe onesifo sesandulela ngculaza emzini wabo, wathi makaphume aphele ngoba “ubolile”, lokhu kuvele enkantolo yezobulungiswa.
USusan Machingura utshele inkantolo ukuthi umyeni wakhe uSergio Tarwirei ubemhlukumeza emshaya aphinde amkhiyele ngaphandle emzini wabo ngoba enesifo sesandulela ngculaza.
UMachingura wafaka lolu daba enkantolo ngoba efuna ukuthola ukuvikeleka ekuhlukunyezweni umyeni wakhe obese kunesikhathi emhlukumeza.
Ngokubika kweBulawayo 24 uMachingura utshele iMantshi uTrevor Nyatsanza ukuthi uTarwirei uyamhlukumeza njalo uma ebuya ukuyocwila ezinkambeni zikaFaro nobhululu bakhe.
OLUNYE UDABA: Uzame ukuzibulala oshaywe ngezinduku zakhe
“Kwesinye isikhathi ungilalisa ngaphandle ebusuku angikhiyele,” echaza.
UTarwirei uziphikile lezi zinsolo wasola uMachingura ngokuba umqwayizi.
“Sobabili siphuza ubhiya futhi uma silwa sisuke sobabili sidakiwe,” kusho Tarwirei.
IMantshi uNyatsanza ukhiphe isinqumo esivuna uMachingura sokuthi uTarwirei angaphinde ahlukumeze wabe esemnxusa ukuba agcine ukuthula phakathi kwabo njengabantu abashadile.
- “Like” ikhasi lethu kuFacebook ukuze uthole izindaba ngolimi lwakho