Lagos – Sekuqubuke indida ngesibalo sabantu bakuleli abashone esigamekweni
sokuwa kwebhilidi lesonto eLagos eNigeria.
Lokhu kuvela ngemuva kokuthi izikhulu
zaseNigeria zibuze uMengameli Jacob Zuma ukuthi ufinyelele kanjani esibalweni
sabantu abangu-67 abashone ngesikhathi kuwa leli bhilidi lesonto ngoLwesihlanu
ngabaseNingizimu Afrika.
Ngokombiko okhishwe yizikhulu zaseNigeria
ngoLwesithathu kuvele ukuthi zingu-70 sezizonke izidumbu esezitholakale
ngaphansi kwaleli bhilidi futhi azikahlonzwa.
NgoLwesibili kusihlwa uMengameli
Zuma uveze ukuthi bangu-67 abantu bakuleli abafe ngesikhathi kwenzeka le
nhlekelele ngoLwesihlanu ebandleni elibizwa ngokuthi iSynagogue Church of All
Nations kanti uyichaze njengembi kunazo zonke esezike zehlela abantu bakuleli
emlandweni.
OLUNYE UDABA: Sesinyukele ku-57 esabashone kudilika isonto
Okhulumela iNational Emergency Management Agency eNigeria u-Ibrahim
Farinloye uthe kusaseduze kakhulu ukuthi kungaphuma isibalo esiqondile sabantu
abashonile noma amazwe abadabuka kuwon.
“UMengemeli
Zuma akekho eNigeria, thina sisebenza ngesikubona la phambi kwethu,” kusho
uFarinloye enanela ngokuthi bangu-131 abantu abahlengwe besaphila kule
nhlekelele.
“Namanje izikhulu zebandla azikasiniki isibalo sabantu abebekhona
kuleli bhilidi yingakho okwamanje sisasebenza ngokuqagela size sipequlule zonke
izinsalela,” esho. Leli bandla liholwa nguMphrofethi wodumo UTB Joshua owaziwa
ngezinto ezahlukene ezimangaza abantu.
Kwingqungquthela yabezindaba
uNgqongqoshe wezangaphandle kuleli uNkk Maite Nkoan Mashabane uthe abajiki
kulesi sibalo njengoba ngokolwazi abanalo bangu-67 abakuleli abashone kule
nhlekele.
Uphinde waveza ukuthi bazosebenzisana nemindeni ethintekile kuze
funyelweni esiphethweni.
- “Like” ikhasi lethu kuFacebook ukuze uthole izindaba ngolimi lwakho