Publications
Partners
Nairobi - Abantu baseNingizimu Afrika ababili bayingxenye yamadoda angu-12 aboshwe eTanzania ngoba esolwa ngobutabane njengoba kunomkhankaso okhona wokuqeda nya ngabaphila le mpilo, kusho amaphoyisa ngoLwesithathu.
"Sibophe izephulamthetho ehhotela elisePeacock - lapho bezigqugquzela khona ubutabane. Ababili kubona ngabaseNingizimu Afrika, omunye owase-Uganda laba abanye abangu-9 ngabaseTanzania," kusho okhulumela amaphoyisa aseDar es Salaam uLazaro Mambosasa esithangamini sabezindaba.
Uthe laba basahlonywa imibuzo ngaphambi kokuba bavele enkantolo.
"ETanzania kuyichilo ukuthi abantu bobulili obufanayo bazibandakanye ezenzweni zocansi, lokho kuphambana nemithetho yezwe," kusho uMambosasa. Unanele ngokuthi imenenja yehhotela ingomunye wababoshiwe "ngokuhlinzeka ngendawo" laba abanye.
OLUNYE UDABA: Kuboshwe abantu abangu-20 abasolwa ngobutabane
UMambosasa unxuse izakhamuzi ukuba zithinte iziphathimandla uma kukhona ezikuzwayo mayelana nobutabane "khona bezosukumela phezulu".
Amaphoyisa abopha abantu abangu-20 - abesilisa abangu-8 nabesifazane abangu-12 - esigamekweni esifazanayo eZanzibar ngenyanga eyedlule.
Uhulumeni waseDar es Salaam uphinde wafunga ngokuphindisela emakhaya bonke abankakhasela amalungelo ezitabane.
Abatholakala bezibandakanya ocansini oluphakathi kwamadoda amabili bangase babhadle ejele iminyaka engu-30 kuya kudilikajele uma belahlwa yicala, nokho asikho isigwebo esibhekiswe ezitabaneni zesifazane.
