Asikho isono uma omnyama ehola kangcono - OweSABC

Johannesburg -Asikho isono uma owesilisa omnyama ehola umholo omfanele, ngokusho kwesikhulu esiphezulu sakwaSouth African Broadcasting Corporation uHlaudi Motsoeneng ngoLwesithathu.

UMotsoeneng uthe i-SABC izimisele ngokuholela noma yisiphi isisebenzi umholo esifanele inqobo nje uma senza okubonakalayo enkampanini.

Lesi sikhulu besikhuluma nezintatheli ngemuva kokuphuma kwemibiko yokuthi umholo waso usunyuke waze wafinyelela ku-R3.7million ngonyaka.

"Noma ngabe ubani okwazi ukuletha inzuzo kwaSABC kumele aklonyeliswe ngomsebenzi wakhe, noma ngabe labo bantu basebenza ukuhlanza ngaphakathi," uMotsoeneng esho.

Kubikwa ukuthi uMotsoeneng wakhushulelwa ngesamba esikhulu semali ngesikhathi eqokwa ngokusemthethweni esikhundleni sokuba yiChief Operating Officer.

OLUNYE UDABA: ISABC iphika eyokukhokhela uMotsoeneng izindleko zasenkantolo

Umholo kaMotsoeneng uhlanganisa nebhonasi ka-R279 000 nenye engu-R916 000 yezidingo zakhe nokunye.

Kuvele ukuthi iSABC iphinde yafaka imali engango-R369 000 emalini yakhe yempesheni nakuleyo ye-madical aid.

Ngokusho kweDemocratic Alliance uMotsoeneng wakhushulelwa ngemali ecishe ifike kwisigidi samarandi esikhathi esingangonyaka.

"Inkinga engabakhona wukuthi iSABC iholela uHlaudi emali engaphezulu kwemfanele.

Kodwa kunemigudu nemithetho elandelwayo ngaphambi kokuthi umuntu ahole umholo awuholayo,"kusho uMotsoeneng enanela ngokuthi akazikhuphulelanga ngokwakhe umholo wakhe.  

Uthe nakuba umholo wakhe ungundabuzekwayo kodwa kunezinye izikhulu esihola ngaphezulu kakhulu kwakhe. 

   - “Like” ikhasi lethu kuFacebook ukuze uthole izindaba ngolimi lwakho

    - Landela IzindabaNews24 kuTwitter