Bafuna ukuqinisa umkhankaso olwisana noWoolworths

Johannesburg – Inhlangano yomphakathi ebizwa ngeBoycott, Divestment and Sanctions in South Africa (BDS SA) isimemezele ukuthi izoyiqinisa imibhikisho yayo yokulwisana nesitolo uWoolworths mayelana nokudayisa izimpahla eziqhamuka kwa-Israel. 

Ngokubikwa kwe-Fin24 izinhlangano ezahlukene sezizwakalise ukungahambisani nesenzo saleli sitolo sokuqhubeka nokuhwebelana nezinkampani zase-Israel. 

Lesi simemezelo se-BDS SA siqhamuka ngemuva kokuthi ngoMgqibelo kuphoqeleke isitolo sakwaWoolworths eRosebank eGoli sivalwe okwesikhashana ngenxa yababhikishi. 

Kuthiwa kulesi sitolo ababhikishi bagcwale ngaphandle bephethe izingqwembe eziphikisana nokuthenga kulesi sitolo ngaphansi komkhankaso #BoycottWoolworths.

Okhulumela i-BDS SA uKwara Kekana uthe bazoyiqinisa imibhikisho yayo ngoba kuyacaca ukuthi lesi sitolo asizimisele ukualela izikhalo zabo.

UKekana uthe abananxa nesitolo uWoolworths kodwa inking yabo nalesi sitolo wukuqhubeka kwaso nokuhwebelana nezinkampani zase-Israel nokuthi siqhubeke nokudayisa izimpahla eziqhamuka kuleli lizwe.

Ngempelasonto zibalelwa ku-40 izitolo zakwaWoolworth ezweni lonke ebekubhikishwa kuzona.  

   - “Like” ikhasi lethu kuFacebook ukuze uthole izindaba ngolimi lwakho

      - Landela IzindabaNews24 kuTwitter