Johannesburg - UMngcinimafa we-African National Congress uMathews Phosa usephinde waqinisekisa abatshalizimali wathi iqembu alinazinhloso zokubuyisela izimayini ngaphansi kukahulumeni.
"Ngifisa ukucacisa lokhu...ngeke i-ANC ichibiyele umthetho othi izimayini azibuyele ngaphansi kukahulumeni, angeke sihambe ngalowo mgudu," kucacisa uPhosa ngesikhathi ethula inkulumo emhlanganweni ngamabhizinisi i-Progressive Business Forum (PBF), eLondon.
"Udaba ngezimayini seludonse isikhathi eside, sesilungise izingqalasizinda ngoba sifuna ukuqinisekisa abatshalizimali ukuthi sizimisele ngokuqhuba nabo ibhizinisi," kusho uPhosa.
Yize noma kube nemizamo yophiko lwentsha ye-ANC yokuthi izinkampani zibe ngaphansi kukahulumeni, iqembu lithi lokho ngeke kwenzeke.
Inyunyana iNational Union of Metalworkers of SA, nayo yafaka isiphakamiso sokuthi izimayini kanjalo namabhange konke kungene ngaphansi kukahulumeni.
– "Like" ikhasi lethu ku-Facebook uze ukwazi ukujoyina inkulumo
ngolimi lwakho.
– Landela IzindabaNews24 kuTwitter (@IzindabaNews24).
News24
