Johannesburg – IDemocratic Alliance isinxuse usihlalo webhodi lakwaSABC u-Ellen Tshabalala ungaqale asule esikhundleni engakalichazeli iPhalamende ukuthi kungabe wasenga ezimithiyo yini ngeziqu zakhe.
I-DA inxusa lokhu nje kusanda kusabalala imibiko kwabezindaba ethi emhlanganweni wesigungu esiphezulu se-ANC ngempelasonto kuphakanyiswe ukuthi uTshabalala uzophushwa ukuthi asule esikhundleni.
Ilungu le-DA ePhalamende uGavin Davis uma uTshabalala esula esikhundleni lokhu kuzochaza ukuthi ngeke esakwazi ukuzochaza ePhalamende mayelana neziqu.
“Lokhu kuzosincisha ithuba lokuthi sithole kabanzi ukuthi ngeziqu zakhe zeBCom neDiploma athi wazithola e-UNISA,” kusho uDavis.
OLUNYE UDABA: Kuzophenywa abakwa-SABC
“UNksz Tshabalala ubesalokhu emile ekutheni akazange aqambe amanga ngeziqu zakhe.
Ukuzophendula ePhalamende yithuba elihle kakhulu ukuze aveze ukuthi umsulwa.”
Kubikwa ukuthi bekulindeleke ukuba uTshabalala azophendula ePhalamende ngoLwesine kodwa kwahlehliselwa umhlaka 14 ku-Okthoba ukuze abe nesikhathi esanele ukuzilungiselela.
UDavis uthe ukuqambela iPhalamende amanga yicala elibomvu.
Ngeledlule ikomidi lezokuXhumana ePhalamende liphakamise ukuthi amiswe uTshabalala esikhundleni sakhe kwazise alinayo igunya lokumumisa lona njengoba kunguMengameli kuphela onalawa mandla.
- “Like” ikhasi lethu kuFacebook ukuze uthole izindaba ngolimi lwakho