Johannesburg – Izinyunyana eziyisithupha embonini yensimbi nezobunjiniyela zisayine isivumelwano samaholo neningi labaqashi ngoLwesibili, saphela isiteleka ebesesidonse amasonto amane.
Kodwa inhlangano eyodwa emele abaqashi, iNational Employers' Association of SA (Neasa), yalile ukusayina isivumelwano yathi ayibandakanywanga ezingxoxweni, ebezenganyelwe uMnyango wezabaSebenzi.
Ngaleyo ndlela, iNeasa, enamalungu angu-22 futhi enabasebenzi abalinganiselwa ku-70 000, isithembise ngokuthi izoqhubeka nokuvalela ngaphandle abasebenzi.
"Kusekhona ukungaboni ngasolinye, ngakho sisazobavalela ngaphandle abasebenzi,” kusho omele iNeasa, uJaco Swart.
Bangaphezulu kuka-200 000 abasebenzi abangaphansi kweNumsa embonini yensimbi nobunjiniyela ababeka phansi amathuluzi ngoJulayi 1, befuna - phakathi kwezinye izinto - ukunyuselwa amaholo ngo-12%.
Ngemuva kokusayina isivumelwano, uNobhala Jikelele we-National Union of Metalworkers of SA (Numsa) u-Irvin Jim utshele amalungu abo asebenza ebusuku ukuba aqhubeke nokubhikisha ngaphandle kwamahhovisi eNeasa.
– "Like" ikhasi lethu ku-Facebook uze ukwazi ukujoyina inkulumo ngolimi lwakho.