Johannesburg – Kulindeleke ukuthi idilize izisebenzi ezibalelwa ku-6000 inkampani yezokumbiwa phansi iLonmin eNingizimu Afrika ebalwa njengenye yezinkampani ezinkulu emhlabeni.
Ngokusho kwesitatimende esikhishwe yile nkampani lokhu kudalwa ukwehla kwamanani nokubiza kwemikhiqizo.
Ukudilizwa kwezisebenzi kule nkampani eqashe abangu-28 000 kuzoqhubeka nokwandisa isibalo sabangasebenzi eNingizimu Afrika nokukhubaza umnotho wezwe.
OLUNYE UDABA:Abakwa-Eskom sebememezele oluka-stage 2
“Ibhodi lithatha isinqumo sokukwehlisa isibalo sezisebenzi ukuze inkampani ikwazi ukuqhubeka nemikhiqizo,” kusho isitatimende sale nkampani.
“Izisebenzi ezingu-6000 okuhlanganisa nezenkontileka zizothikamezeka ngalokhu njengoba sizovala ezinye zezindawo esisebenzela kuzo.
Kuyinjongo yethu ukuthi lokhu sikwenze ngempumelelo ngokubambisana nazo zonke izinhlaka ezithintekayo.”
- “Like” ikhasi lethu kuFacebook ukuze uthole izindaba ngolimi lwakho