Johannesburg – Amaphoyisa aqaphe isimo endaweni yaseKrugersdorp ngemuva kokuba abasebenzi belimaze isakhiwo sasePost Office.
Kukholakala ukuthi abantu abangu-100 baphose amatshe kulesi sakhiwo nasezimotweni ebezipakile ngaphandle.
Kulimale abantu abathathu ngemuva kokushaywa.
OLUNYE UDABA: Sibukeka sisazoqhubeka isiteleka sasePosini
Abasebenzi sebeteleke izinyanga ezintathu njengoba abayitoho befuna ukuqashwa ngokuphelele kanti abanye bafuna ukukhushulelwa amaholo ngamaphesenti angu-15.
Lesi siteleka sesidale umonakalo omkhulu besabisa nalabo abangatelekile, kubika abe-Eyewitness News.
Okhulumela amaphoyisa u-Appel Ernst uthi amaphoyisa asiqaphile isimo njengoba ababhikishi benza umonakalo.
Abaphathi basePost Office nalabo abamele abasebenzi abatelekile baphezu kwezingxoxo zokuzama ukuqeda isiteleka.
Abenyunyana iCommunications Workers Union bathi abaphathi sebeke esinye isiphakamiso etafuleni.
- “Like” ikhasi lethu kuFacebook ukuze uthole izindaba ngolimi lwakho