Johannesburg – Kubikwa ukuthi inzuzo yakaWoolworths ibephansi ngo-10% kulokho obekuqaguliwe ngenxa yokuthi yasuke yathenga inkampani yase-Australia, iDavid Jones.
Inkampani yakwaWoolworths ithe amanani amasheya ngalinye ehle ngo-360 cents, nokungaphansi kuka-389c owawuqagulwe abahlaziyi abangu-14 ocwaningweni olwenziwa yiReuters.
Inkampani yakwaWoolworths, esanda kuthenga isitolo esingesesibili ngobukhulu sase-Australia, iDavid Jones, ithe ukuthengwa kwemikhiqizo kwenyuke ngo-14.4% kwafinyelela ku-R39.5bn.
Kunzima ezitolo zaseNingizingizimu Afrika ukuthi kwenyuke ukuthengwa kwemikhiqizo njengoba amakhasimende ezibamba ekuthengeni ngenxa yezikweletu abanazo, yizinga eliphezulu labantu abangasebenzi kanye namanani aphezulu kaphethiloli nawezinto zokuthutha.
Kodwa uWoolworths, osebenza ngendlela efanayo nenkampani yaseBrithani iMarks & Spencer, wenza kangconywana ngoba iningi lamakhasimende awo lingabantu abahola kangcono.
Amasheya enkampani yakwaWoolworths enze inzuzo ezinyangeni ezingu-12 ezedlule, kanti yenze kahle kakhulu uma kuqhathaniswa neMassmart nezinye izinkampani.
– "Like" ikhasi lethu ku-Facebook uze ukwazi ukujoyina inkulumo ngolimi lwakho.