Johannesburg – Inkampani enkulu yabeluleki bezimali iRothschild iqoke lowo
owayengiNgqongqoshe wezeziMali eNingizimu Afrika uTrevor Manuel esikhundleni
sokuba ngumeluleki wayo.
Ngokombiko
we-Fin24 le nkampani iveze lokhu ngoLwesibili lapho iveze khona ukuthi izizwa
ihloniphekile ngokujoyinwa ngumuntu osezingeni likaManuel.
“IRothschild
iyakuthokozela ukumemezela ukuthi isiqoke uTrevor Manuel njengomaluleki wayo
emhlabeni wayo jikelele futhi nokuba yiSekela likaSihlalo weRothschild South
Africa kusukela ngomhlaka 1 ku-Okthoba 2014,” kusho uSihlalo wale nkampani
uDavid de Rothschild kwisitatimende.
OLUNYE UDABA: Ningakhathazeki ngezwe elingenaMandela - Manuel
“Isipiliyoni anaso emnothweni eNingizimu
Afrika ngaphansi koMengameli abehlukele nezinye izikhundla ake waziqhoqhobala
emhlabeni kumenza akulungele ukuba yingxenye yenkampani futhi uzodlala indima
ebalulekile,” kuqhuba isitatimende.
UManuel usanda kuthatha umhlala phansi
kwezepolitiki ngemuva kweminyaka engu-20 eqhoqhobele izikhundla ezahlukene
kuhulumeni njengoba eshenxe esenguNgqongqoshe ehhovisi likaMengameli.
Kuthiwa
uManuel uzwakale ejabulile ukuqokelwa esikhundleni sakhe.
Uthe uzimisele ukuthi
ukukhulisa le nkampani e-Afrika yonkana.
- “Like” ikhasi lethu kuFacebook ukuze uthole izindaba ngolimi lwakho