San Francisco – Izikhangisi ezifakwa kuFacebook sezisize le nkundla yezokuxhumana ehamba phambili emhlabeni ukuba ikhule ngo-61% imali engenayo, yaphinde yaqopha umlando ngokubeka phezulu inani lamasheya ayo ngehora elilodwa nje izimakethe zivuliwe ngoLwesithathu.
AbakwaFacebook ngoLwesithathu bathe babone sikhula isibalo sabantu abafaka izikhangisi kule nkundla esigabeni sesibili sonyaka, kanti nenzuzo yenkampani nayo ikhombise ukukhula kakhulu.
U-Facebook manje unamakhasimende abalelwa ku-1.5 million afake izikhangisi, kusho isikhulu esiphezulu uSheryl Sandberg sitshela abe-Reuters ngoLwesithathu.
"Sibona amakhasimende ethu eqhubeka nokukhangisa kakhulu kunakuqala futhi nesibalo samakhasimende amasha naso siyakhula, kusho uSandberg.
Amasheya kaFacebook abeseqala emalini elinganiselwa ku-$75.13 ngemuva kwehora kuvulwe izimakethe ngoLwesithathu, nokwenza le nkampani ibize cishe imali elinganiselwa ku-$190bn, okuyimali engaphezulu kakhulu kongathenga ngayo i-IBM.
– "Like" ikhasi lethu ku-Facebook uze ukwazi ukujoyina inkulumo ngolimi lwakho.