Kume konke amabhasi evimbe imigwaqo eMlazi

Durban - Yonke into ime nse eMlazi eThekwini ngoLwesihlanu ntambama njengoba abashayeli bamabhasi akamasipala weTheku beshiye amabhasi maphakathi nemigwaqo esetshenziswa kakhulu.

Kube nesiminyaminya elokishini laseMlazi eThekwini njengoba amaphoyisa omgwaqo abezama ukugudluza amabhasi emgwaqeni.

Bekungahambeki emgwaqeni omkhulu waseMangosuthu, amaphoyisa edlulisa izimoto. Lo mgwaqo ubugcwele amatshe eduzane nasesikhumulweni samabhasi. Amaphoyisa abebonakala engenisa amabhasi esikhumulweni sawo.

OLUNYE UDABA: Bavale uN2 abashayeli bamabhasi eThekwini

Abashayeli bebethukuthele bethi abakaze baholelwe kusukela ngoNovemba ngonyaka ophelile.

Ekuqaleni kwesonto abakwamasipala bakhipha isitatimende bethi sekuholelwe abashayeli abangu-238 bakamasipala ngaphansi kwenkampani iTransnet.

Inkampani iTransnet yehluleka ukuholela abasebenzi bayo umholo ka-Disemba namabhonasi abo.

Abakamasipala bavumelana nabakwaTransnet ngokuthi yibo abazoholela abasebenzi ngenhloso yokugwema isiteleka.

Yize kunjalo abanye babashayeli abazange bayithole imiholo yabo, kubika i-eNCA.

- “Like” ikhasi lethu kuFacebook ukuze uthole izindaba ngolimi lwakho                                

 - Landela IzindabaNews24 kuTwitter