Abadlali badunguza ebumnyameni ngokuthengwa kwe-ACES

Johannesburg –  Badunguza ebumnyameni abadlali beMpumalanga Black Aces kulandela imibiko ethi leli qembu selithengwe AmaZulu, ngokusho kombiko.

Ngokubika kweSport24 omunye wabadlali ocele lingadalulwa igama lakhe uthe ushaqekile njengoba eqale ukuzwa ngalokhu kwabezindaba.

“Angazi ngingaqala kuphi, sonke njengabadlali sisathukile ngale mibiko njengoba izolo yonke into iqhubeke ngokujwayelekile ejimini. Asikatshelwa lutho,” kusho lo mdlali.

“Lesi simo sisithuse kakhulu njengoba sisalinde izikhulu zeqembu zizosicacisela ngeminingwane njengoba konke esisakuziwile sikuthola kwabezindaba.”

OLUNYE UDABA: Kubuye abebebolekisiwe kwiDowns

Uthe kunzima ukuqonda ukuthi i-Aces ingadayiswa kanjani njengoba isanda kuletha umqeqeshi onesipiliyoni njengoMuhsin Ertugral nomsizi wakhe uPatrick Mabedi.

I-Aces isanda kusayina umdlali oqhamuka kwi-Orlando Pirates u-Aubrey Ngoma nonozinti Shu-Aib Walters osuka kwiMaritzburg United.

Khona manjalo iSport24 ibike ukuthi iPremier Soccer League iyayichitha le mibiko yokuthi la maqembu asedayiselene.  

Isikhulu sePSL uBrand de Villiers uthe akanalo ulwazi ngale mibiko.

“Iligi ayikaziswa lutho ngale mibiko ngakho siyithatha njengento engekho,” kusho uDe Villiers.

      - “Like” ikhasi lethu kuFacebook ukuze uthole izindaba ngolimi lwakho

        - Landela IzindabaNews24 kuTwitter