Johannesburg - Umgadli weKaizer Chiefs, uDavid Zulu, uthi akangabazi nakancane ukuthi abalandeli beKhosi bayamthemba ekutheni kukhona angakwenzela iqembu.
Uthe lokhu kufakazelekile esikwatini abasiqokile ukuthi siqale umdlalo koweCarling Black Label Cup ngoMgqibelo, kubika iSoccer Laduma.
Lo mdlali, 29, wajoyina amaGlamour Boys esuka kuChippa United ngoJanuwari kepha wangalithola kahle ijezi ngaphansi kukaStuart Baxter ngesizini yesibili ka-2014/15.
OLUNYE UDABA: Ngeke ngigxile ekuphoxekeni kwami - Zulu
Yize kunjalo, abalandeli beChiefs batshengise ukumethemba lo mdlali oqhudelana noSiphelele Mthembu, Camaldine Abraw noBongani Ndulula.
“Bangivotele ukuthi ngibe yingxenye yesikwati esizoqala kowe-CBL Cup. Lokho kutshengisa ukuthi kukhona into abayibone kimi abacabanga ukuthi ngingayenzela iqembu."
“Ngeke ngiphawule ngokuthi ngabe ngiyinhlobo yomdlali ofanelwe ukudlalela iChiefs noma cha. Lokho kuyocaca enkundleni."