Johannesburg – Isilomo somdlali wasesiswini se-Orlando Pirates u-Oupa Manyisa ungomunye wabadlali baseNingizimu Afrika asebedlale imidlalo eminingi kule minyaka emibili eyedlule.
Ngokubika kweSoccerLaduma lo mdlali ongukaputeni wamaBhakabhaka akakaze akuthole ukuphumula kule minyaka njengoba ebeyingxenye yemidlalo eyahlukene yeBafana Bafana neyeqembu lakhe.
IBucs isanda kubuyela kuleli ngemuva kokuyodlala umdlalo weCAF Confederations Cup eTunisa lapho ihlule khona i-CS Sfaxien ngegoli elilodwa eqandeni.
Kulo mdlalo uManyisa udlale yonke imizuzu engu-90.
OLUNYE UDABA:UKhune unqabe isiphakamiso sokuya eDenmark - Umbiko
Ngokubona imidlalo yeBucs kuse kude lo mdlali athole ikhefu alidingayo njengoba ngoMgqibelo ezobe edlala umqhudelwano weCarling Black Label Cup neKaizer Chiefs kuthi ngemuva kwezinsuku ezintathu iqembu lakhe liphinde libhekane ne-Ajax Cape Town emqhudelwaneni e-MTN8.
Ekhuluma neSoccerLaduma uManyisa uvumile ukuthi uyalidinga ikhefu kodwa ukubeke kwacaca ukuthi uzokwazi ukubhekana nenselelo ezayo uma engalitholi ikhefu.
"Angikaze ngiphume eminyakeni emibili.
Bengidlala kwiChampions League, ngadlala kwi-AFCON ngaphinde ngadlala kwiCHAN nemidlalo yeligi.
Akukhona ukuthi ngikhathele – kubalulekile ukuthi umzimba uhlale ukhuthazekile kodwa uyakudinga futhi nokuphunyuzwa.
Ayikho ingozi ngalokhu ngoba ngiyazifela ngebhola likanobhutshuzwayo,” kusho lo mdlali oteketiswa ngelika-Ace.
UManyisa uyena ohamba phambili ngamavoti kubadlali abagijima ensimini kwiCarling Black Label Cup.
- “Like” ikhasi lethu kuFacebook ukuze uthole izindaba ngolimi lwakho