Johannesburg - I-Orlando Pirates ufulathele leli ngoLwesihlanu ukuyobhekana neqembu laseGabon, i-CF Mounana, kowe-CAF Confederation Cup ihamba ngaphandle kukaKermit Erasmus noThabo Matlaba, abalimele.
IPirates yadlulela emzuliswaneni olandelayo ngemuva kokushaya i-Uganda Revenue Authority ngo 4-3 emilenzeni emibili yomzuliswano wokuqala.
AmaBhakabhaka sekuyiwona kuphela iqembu laseNingizimu Afrika elidlala emqhudelwaneni wase-Afrika kulandela ukuphuma ekuseni kweKaizer Chiefs neMamelodi Sundowns kowe-CAF Champions League.
OLUNYE UDABA: Asimdingi ukaputeni weSenegal - Pirates
Okhulumela iqembu uMickey Modisane utshele iKickOff.com ukuthi unozinti uBrighton Mhlongo uyingxenye yesikwati esilibangise eLibreville.
"U-Erasmus noMatlaba basele ngenxa yokulimala, kepha izindaba ezimnandi zithi uMhlongo useluleme kanti uhambe neqembu,” kuqinisekisa uModisane.
Lo mdlalo uzoqala ngeSonto ngo-16:30.