Johannesburg – Umnikazi weqembu eligijima kwi-Absa Premiership uSiviwe ‘Chippa’
Mpengesi ophethe iChippa United uthe iqembu lizivulile izandla ukuba sezingxoxweni zokuthengisa
umgadli uDavid Zulu.
Ngokubika
kwe-KickOff lo mgadli oneminyaka engu-27 ubudala esabhakuzise inethi izikhawu
ezine kule sizini kanti namaqembu akhombisa intshisekelo kuyena ayanda kakhulu.
UMpengesi ukuqinisekisile ukuthi iKaizer Chiefs ingelinye lamaqembu azimisele
ukumthenga lo mgadli owashaya ingcwenga yegoli ngesikhathi iChippa ibhekene
ne-Orlando Pirates.
“Ngiyajabula kakhulu ukuthi uZulu odlale iqembu lami uyakwazi
ukuheha amaqembu athathwa njengamakhulu,” kusho uMpengesi.
OLUNYE UDABA: IChippa United izodayisa uPietersen ngo-R5m
“Ngiysaziqhenya
ngaye futhi ngimtshelile lokho. Kumele samukele futhi sivumelane ukuthi
sivulelekile ukuba sezingxoxweni naloma yiliphi iqembu elifuna ukumthenga.
Kubukeka sengathi kukhona okuhle okuzayo kuye futhi simfisela okuhle kodwa,”
kusho lesi sikhulu.
UMpengesi wenqabile
ukudalula ukuthi malini abayibekile ngalo mgadli obeyingxenye yeqembu likaShakes Mashaba
iBafana Bafana emidlalweni yokuhlunga ye-2015 Africa Cup of Nations nakuba
engadlalanga.
“Ngengoba ngake ngasho phambilini ukuthi angikho ebholeni
ukuzokwenza ibhizinisi, kimina okubalulekile ukuphatheka kahle komdlali. Uma
ekujabulela ukuya lapho efuna ukuya khona, okunye nokunye kuzolandela,” esho.
- “Like” ikhasi lethu kuFacebook ukuze uthole izindaba ngolimi lwakho