Johannesburg – Inhlangano eyengamele ibhola likanobhutshuzwayo kuleli i-South African Football Association idalule ukuthi izohlela imidlalo emibili ebalulekile yeBafana Bafana ngenhloso yokuhlanganisa amazwe ukulwa nesihlava sokuhlaselwa kwabokufika.
Isikhulu esiphezulu se-SAFA uDennis Mamble uthe bazosebenzisa ibhola likanobhutshuzwayo ukuhlanganisa abantu ngokuhlela imidlalo namanye amazwe ase-Afrika.
“Le midlalo sihlose ngayo ukuhlanganisa izwekazi i-Afrika.
Obekwenzeka kulezi zinsuku ezehlule kushiye abantyu abaningi beshaqekile futhi bedumele,” kusho uMumble kwisitatimende esikhishwe yile nhlangano ngokubika kweSoccerLaduma.
“Sesiqoke ukuthi ukuthatha elinye igxathu ukulwa nokucwasana nodlame olubhekiswe kwabokufika.
OLUNYE UDABA: I-SAFA igxeke ukuhlaselwa kwabokufika
UMadiba wakhuluma ngamandla ezemidlalo ekuhlanganiseni abantu abahlukene, ngakho sizosebenzisa amandla ebhola likanobhutshuzwayo ukuhlanganisa abantu baleli lizwekazi.”
UMumble uthe izigameko zakamuva zodlame olubhekiswe kwabokufika sezithunaze isithunzi seNingizimu Afrika.
“Iningi labantu kwezemidlalo seliphumele obala lazwakalisa ukushaqeka nokungahambisana nezigameko zakamuva.
Sifuna ukuthumela umyalezo ukuthi kulabo abaqhuba lezi zigameko ukuthi kubi abakwenzayo futhi asihambisani nakho,” kusho uMumble enanela ngokuthi basazowamemezela amazwe azodlala neBafana maduze.
- “Like” ikhasi lethu kuFacebook ukuze uthole izindaba ngolimi lwakho