ISAFA izoqhubeka nokushushisa abazihlangula kwiBafana

Johannesburg – ISouth African Football Association ithe isazoqhubeka nokushushisa abadlali abanquma ukuzihlangula kwiBafana Bafana ngesikhathi ihambele e-Australia naseNew Zealand ekupheleni kwesizini edlule.

Kuzokhumbuleka ukuthi ngoMeyi kulo nyaka kunabadlali abachitha iBafana Bafana ngesikhathi isengaphansi komqeqeshi uGordon Igesund.

I-CEO yeSAFA uDennis Mumble utshele iKickOff ukuthi basazoqhubeka nokuthi babashushise abadlali abanqaba ukuba yingxenye yeBafana Bafana.

Kulaba badlali kubalwa uTeko Modise, Sthembiso Ngcobo, Oupa Manyisa noThabo Matlaba.

OLUNYE UDABA:  ISAFA ibambe umoya ngabadlali kowokuhlonipha uMandela

“Sizobashushisa labo badlali abanqaba ukuya e-Australia naseNew Zealand,” kusho uMumble engqungqutheleni yabezindaba.

“Uma sifuna ukushushisa umdlali odlala kwiPSL sizokwenza lokho ngoba siyiSAFA futhi yithina esengamele ibhola likanobhutshuzwayo kuleli,” esho.

UMumble akafunanga ukuchaza ngesijeziso salaba badlali uma betholwa benecala kodwa waveza ukuthi lokho kuzonqunya yikomidi lokuqondiswa izigwegwe.  

      - “Like” ikhasi lethu kuFacebook ukuze uthole izindaba ngolimi lwakho

         - Landela IzindabaNews24 kuTwitter