Johannesburg – Umgadli osanda kusayina neKaizer
Chiefs uDavid Zulu okulindeleke ukuba aqale kuleli qembu ngonyaka ozayo
kuzomele ajabulile uStuart Baxter ukuze athole ijezi.
Ngokubika kwe-SoccerLaduma iChiefs ihlukane
nesizumbulu sika-R4 million ukuthi ithole lo mdlali ovutha engabaselwe kulezi
zinsuku.
UZulu oneminyaka engu-28 ubudala ubalwa nabanye abagadli bakuleli
abangalibheki ipali lokhu sekuholele akutheni abizelwe esikwatini seBafana Bafana
ngaphansi komqeqeshi uShakes Mashaba.
Kulindeleke ukuthi ajoyine Amakhosi
ngoJanuwari futhi aqhubeke nokubhakuzisa inethi njengoba enamagoli amane kule
sizini.
OLUNYE UDABA: UZulu usayine neChiefs - Umbiko
Kuzokhumbuleka ukuthi Amakhosi athenge abadlali ekuqaleni kwale sizini
okubalwa kubo uPhakamani Mngadi, Ovidy Karuru, Siphelele Mthembu noLevy
Mokgothu kanti bonke laba badlali kusalindeleke ukuba bakhuphule amasokisi
ukuze bakwazi ukudlala njalo kuleli qembu njengoba iningi labo lingakaze
lidlale emqhudelwaneni emikhulu.
Kubona uMthembu okubukeka ejwayele ukuthola
ijezi kodwa naye usavamise ukungena umdlalo usuyophela.
Kuzomele uZulu
ajabulise kakhulu uBaxter ukuze akwazi ukuthola indawo kuleli qembu elijwayele
ukuhlasela ngoBernard Parker noKingston Nkatha.
- “Like” ikhasi lethu kuFacebook ukuze uthole izindaba ngolimi lwakho